A Casa da Galería de Castro de Rei continúa a súa programación cunha sesión sobre Begoña Caamaño
A Fundación Margarita Ledo Andión continúa a súa programación cultural o vindeiro 4 de setembro, ás 19.00 horas, na Casa da Galería de Castro de Rei, coa conferencia Begoña Caamaño: xornalismo para a cidadanía, a cargo da xornalista e escritora María Xosé Porteiro. O encontro completarase coa proxección do documental Begoña Caamaño: navegar no pracer do azul, realizado con motivo das Letras Galegas 2026.
Antes de se incorporar á literatura, Begoña Caamaño desenvolveu unha longa traxectoria xornalística vinculada especialmente á radio. Desde os anos oitenta cubriu información laboral, social, internacional e cultural, primeiro no Vigo marcado pola reconversión industrial e posteriormente na Radio Galega, onde transcorreu boa parte da súa carreira profesional. O cultivo das fontes, o contraste da información e a responsabilidade cara á audiencia formaron parte dun xeito de exercer o oficio que estivo tamén ligado á defensa dos medios públicos e á denuncia da manipulación informativa.
A conferencia de María Xosé Porteiro permitirá profundar nesta faceta a partir da investigación recollida no seu libro Begoña Caamaño. Xornalismo para a cidadanía. De Vigo a Compostela, publicado este ano por Editorial Galaxia. Compañeira de profesión e amiga de Caamaño, Porteiro reconstrúe a súa traxectoria xornalística atendendo á relación entre o exercicio profesional, a realidade social do seu tempo e unha implicación feminista que atravesou tamén a súa vida pública.
Esta aproximación dialogará coa proxección de Begoña Caamaño: navegar no pracer do azul. O documental percorre a súa biografía entre Vigo e Compostela mediante as voces de familiares, amigas, compañeiras e persoas vinculadas á súa obra. A memoria compartida permite ampliar o retrato profesional e achegarse tamén á escritora que anos máis tarde trasladaría á literatura a súa revisión feminista dos mitos clásicos.
A actividade forma parte da programación cultural da Fundación Margarita Ledo Andión e terá lugar na Casa da Galería, en Castro de Rei.