A Comisión Organizadora das Festas da Milagrosa xa traballa na edición de 2027
A Comisión Organizadora das Festas da Milagrosa xa comezou os traballos para preparar a edición de 2027, segundo anunciou Miriam Souto, que explicou que, tras a celebración das festas deste ano, o equipo decidiu dar continuidade ao proxecto ante as peticións recibidas por parte de numerosos veciños e veciñas.
Souto trasladou en primeiro lugar o agradecemento da organización a todas as persoas, entidades, establecementos, colaboradores, empresas e administracións que fixeron posible a celebración das Festas da Milagrosa 2026. Segundo sinalou, o recoñecemento esténdese especialmente aos veciños e veciñas do barrio polas súas mostras de apoio e polas palabras de ánimo recibidas durante e despois das festas.
A integrante da comisión destacou que as festas "non pertencen a ningunha persoa nin a ningún grupo", senón que forman parte da historia, das tradicións e da vida colectiva da Milagrosa. Neste sentido, Souto defendeu que a organización debe afrontarse desde "o traballo, a responsabilidade, a colaboración" e a vontade de ofrecer unha programación capaz de reunir nas rúas e prazas a persoas de todas as idades.
Segundo explicou, nas últimas semanas varias persoas do barrio trasladaron á organización o seu desexo de que o equipo que se encargou das festas de 2026 continúe á fronte da preparación das próximas edicións. Souto sinalou que, tras valorar esta petición e ser conscientes do traballo que implica organizar unhas festas destas características, decidiron "dar ese paso" e comezar xa coa preparación de 2027.
A organización xa mantén contactos e negociacións para configurar a programación musical e festiva do próximo ano. Souto avanzou que o proxecto contempla catro xornadas consecutivas con orquestras na Praza da Milagrosa, desde o xoves ata o domingo, mantendo este espazo como un dos principais puntos de encontro das festas.
Aínda que algunhas das actuacións están "moi avanzadas" e outras continúan en fase de estudo e negociación, Souto explicou que por razóns contractuais e de programación aínda non poden facerse públicos os nomes das formacións. A intención, segundo indicou, é presentar unha proposta musical "atractiva e equilibrada" para as catro xornadas.
Souto tamén avanzou que a organización quere manter e potenciar o recinto feiral e o conxunto de actividades para que as Festas da Milagrosa volvan desenvolverse durante varios días e conten con propostas para nenos, mozos, familias e persoas maiores.
A integrante da comisión explicou que o proxecto de 2027 parte da experiencia adquirida este ano, polo que permitirá identificar os aspectos que funcionaron e aqueles que poden mellorarse. Segundo Souto, dispoñer de máis tempo para planificar permitirá tamén buscar novas colaboracións e construír unha programación máis ampla.
Este novo traballo desenvolverase, ademais, no marco de Milagrosa Convive, asociación cultural, social e veciñal recentemente impulsada por persoas vinculadas á organización e á vida social do barrio. Souto explicou que esta entidade nace cunha vocación máis ampla de dinamización cultural, social e comunitaria da Milagrosa.
Neste sentido, Souto asegurou que a vontade da organización é manter "unha actitude aberta" e facer das festas "un espazo de encontro e non de división". Para iso, sinalou que queren colaborar con veciños, comerciantes, hostalaría, asociacións, entidades sociais, administracións públicas e todas as persoas que queiran contribuír de maneira construtiva.
A integrante da organización resumiu o obxectivo para 2027 na intención de que A Milagrosa conte con "unhas festas importantes, participativas e á altura do que merece o barrio". Souto engadiu que non queren entrar en debates sobre o traballo realizado no pasado e asegurou que respectan a todas as persoas que contribuíron ao longo dos anos a manter vivas estas celebracións.
"Corresponde agora mirar cara adiante", afirmou Souto, que confirmou publicamente que os traballos para as Festas da Milagrosa 2027 xa están en marcha. Segundo avanzou, a intención é manter varios días de celebración, catro xornadas con orquestras na Praza da Milagrosa e unha programación que se irá dando a coñecer progresivamente a medida que se pechen as contratacións e actividades.
Souto concluíu destacando que A Milagrosa "ten historia, ten identidade e, sobre todo, ten veciños con ganas de seguir facendo barrio". "Nós xa estamos traballando para que en 2027 volva estar de festa", afirmou.