A Deputación de Lugo inicia as obras de mellora na estrada LU-P-4905 entre Portomarín e Taboada
A Deputación de Lugo vén de iniciar as obras de mellora na estrada provincial LU-P-4905, que conecta os concellos de Portomarín e Taboada. Esta intervención céntrase nos primeiros 10,5 quilómetros da vía, ao seu paso polo termo municipal de Portomarín, e conta cun prazo de execución estimado de mes e medio desde o inicio dos traballos.
A empresa Construcciones y Obras Taboada Ramos SLU é a encargada de executar a actuación, que inclúe a reapertura de cunetas, o saneo da explanada e a renovación do firme mediante pavimentación. O obxectivo principal é mellorar a seguridade viaria e as condicións de circulación neste treito da rede provincial, que soporta un volume constante de desprazamentos.
Esta intervención dá continuidade a un proxecto anterior de mellora da mesma estrada, que xa afectara a outro tramo cun investimento de 200.000 euros. Co conxunto destas actuacións, a Deputación de Lugo prevé completar a renovación integral da LU-P-4905, unha vía considerada clave para a conectividade da zona.
Trátase dunha obra de especial relevancia para a mobilidade local, xa que esta estrada funciona como principal vía de comunicación entre Portomarín e Taboada e dá servizo directo a numerosas parroquias da súa área de influencia. A mellora permitirá facilitar os desprazamentos diarios da veciñanza, incrementar a seguridade viaria e reforzar a cohesión territorial e a conectividade entre ambos municipios.