A Escola Municipal de Música de Lugo reabrirá as súas portas no curso 2026-2027
A Escola Municipal de Música de Lugo volverá poñerse en marcha durante o curso 2026-2027, recuperando a súa actividade despois de permanecer sen servizo nos dous últimos cursos académicos.
Segundo avanzou o Concello de Lugo, o prazo ordinario de matrícula abrirase entre o 1 e o 15 de setembro, mentres que as clases comezarán oficialmente o vindeiro 13 de outubro. Deste xeito, a cidade recuperará un servizo educativo e cultural que chegou a contar con máis de 300 persoas matriculadas.
As listaxes provisionais de persoas admitidas faranse públicas entre o 21 e o 24 de setembro, mentres que as definitivas se darán a coñecer entre o 28 de setembro e o 1 de outubro.
Ademais, a partir do 13 de outubro abrirase un período extraordinario de matrícula para aquelas materias nas que continúen existindo prazas dispoñibles.
A reapertura da Escola tamén permitirá recuperar a actividade vinculada á Banda Municipal ao longo do curso con distintas iniciativas culturais e musicais. Entre as propostas previstas atópanse a celebración dun concerto con motivo de Santa Icía, patroa da música, un concerto de Nadal e a recuperación dos concertos didácticos.
Por outra banda, o Concello iniciou tamén o proceso de renovación da Xunta Directiva da Escola Municipal de Música. Tras a publicación das normas correspondentes nos taboleiros oficiais, abrirase un prazo de catro días hábiles para a presentación de candidaturas no Rexistro Xeral municipal. Posteriormente publicarase unha listaxe provisional, habilitándose un período para alegacións antes da proclamación definitiva.