A Escola Semente de Lugo celebra o Samaín cun obradoiro infantil, contacontos e chocolatada
A escola Semente de Lugo prepara unha nova celebración do Samaín para o vindeiro venres 30 de outubro. A partir das 17:00 horas, as instalacións do centro acollerán unha festa dirixida ás familias, con propostas pensadas para que as nenas e os nenos desfruten desta tradición da cultura galega, vinculada á celebración de Santos e Defuntos.
Entre as actividades programadas figuran a pintura facial con motivos propios destas datas, un espectáculo de contacontos e un obradoiro no que os participantes poderán decorar cabazas de xeso. A xornada completarase cunha chocolatada acompañada de biscoito, con alternativas sen azucre. O prezo é de 6 euros por familia, que se reduce a 5 euros para as socias da Semente. As persoas interesadas deberán formalizar a inscrición a través do correo electrónico da asociación.
A Semente está situada na antiga escola unitaria de Barbaín, na parroquia de Santa María de Bóveda, e iniciou a súa actividade escolar en setembro de 2016, polo que este ano cumpre unha década de traxectoria. O seu proxecto educativo ten como eixes a revitalización da lingua e da cultura galegas, unha filosofía que tamén se reflicte nas celebracións que organiza ao longo do curso, entre elas o Samaín, a chegada do Apalpador, o Entroido e os Maios.
A seguinte cita do calendario será o magosto, previsto para o 13 de novembro. Ademais da tradicional degustación de castañas, a programación incluirá a representación da obra *A fada do saco verde*, da compañía Loia Producións, integrada no Circuíto de Teatro Profesional da Deputación de Lugo.