A Festa do Pemento de Mougán regresa a Guntín con degustacións, música e verbena
O Pemento de Mougán volverá ser protagonista en Guntín coa celebración da XXIII Festa do Pemento, que terá lugar os días 29 e 30 de agosto na Carballeira de Meixaboi. A programación combinará gastronomía, música e actividades populares durante dúas xornadas dedicadas a poñer en valor este produto amparado pola Indicación Xeográfica Protexida.
A festa arrancará o sábado 29 ás 13.30 horas coa actuación da Banda Municipal de Guntín. Media hora máis tarde, ás 14.00 horas, Amanda Pérez, de Mate Estudio, será a encargada de pronunciar o pregón desta edición.
Un dos momentos centrais da primeira xornada chegará ás 14.15 horas coa degustación gratuíta de Pemento de Mougán e tortilla de pemento. A programación continuará pola tarde, ás 17.00 horas, cun campionato de tute, mentres que ás 18.00 horas será a quenda dun DJ.
A actividade prolongarase ata a noite coa verbena que ofrecerá a Orquestra Acordes de Grolos a partir das 23.00 horas.
A celebración continuará o domingo 30 cunha xornada novamente marcada pola gastronomía e a música. A Orquestra Galaxia abrirá o programa ás 13.30 horas cunha sesión vermú e, ás 14.30 horas, terá lugar unha comida campestre na Carballeira de Meixaboi.
A XXIII Festa do Pemento de Mougán despedirase a partir das 18.30 horas cunha nova actuación da Orquestra Galaxia de Ourol.
A cita está organizada polo Concello de Guntín e busca continuar promocionando un dos produtos máis representativos do municipio, reunindo arredor do pemento veciñanza e visitantes durante toda unha fin de semana.