A Louzaneta dá un paso definitivo para regularizar unha urbanización pendente desde hai máis de 20 anos
O proceso de regularización urbanística dos polígonos 1 e 2 da Louzaneta dá un novo paso coa decisión do Concello de Lugo de iniciar a recepción parcial das obras de urbanización. A medida, que conta cos informes favorables da Asesoría Xurídica e dos servizos municipais de Enxeñería, permitirá avanzar cara á normalización dun ámbito residencial que permanecía pendente dunha solución definitiva desde hai máis de dúas décadas.
A recepción parcial facilitará a incorporación progresiva da urbanización ao patrimonio municipal e permitirá continuar coa tramitación necesaria para completar a recepción definitiva de ambos os polígonos.
Como parte deste proceso, o Concello asumirá a xestión e execución das obras de soterramento da liña de media tensión, unha actuación imprescindible para completar a urbanización. A intervención será financiada polas xuntas de compensación, é dicir, polos propietarios, mentres que a Administración local se encargará da súa execución co obxectivo de axilizar os trámites e reducir os prazos.
Segundo explican desde o Concello, esta actuación permitirá avanzar na resolución dunha situación urbanística que se prolongou durante máis de vinte anos, favorecendo un desenvolvemento ordenado da zona e achegando maior seguridade xurídica aos propietarios.