A música da Occitania medieval protagoniza unha nova cita do ciclo “Lugo, de trovas e cantigas”
A Capela de Santa María será escenario este sábado 9 de agosto dunha nova actuación do ciclo musical “Lugo, de trovas e cantigas”. Trátase do terceiro concerto desta programación, que achega ao público diferentes expresións da música histórica.
A cita, titulada O anónimo murmurio, estará a cargo da formación Corpora Subtilia, dirixida polo músico e musicólogo portugués Paulo Gonçalves, recoñecido polo seu traballo na recuperación e interpretación do repertorio medieval.
Durante o concerto, os asistentes poderán escoitar baladas, rondós e virelais compostos entre finais do século XIV e comezos do XV na rexión histórica de Occitania. Estas pezas pertencen ao período coñecido como Ars Subtilior, unha etapa da historia da música caracterizada pola súa gran complexidade rítmica e pola sofisticación dos sistemas de notación empregados polos compositores da época.
A actuación dará comezo ás 20:00 horas e a entrada será libre e gratuíta ata completar a capacidade da Capela de Santa María.