A Piringalla celebrará cinco días de festas na honra a San Isidro cun amplo programa de actividades
O barrio da A Piringalla, en Lugo, prepara unha nova edición das súas festas na honra a San Isidro, que se desenvolverán entre os días 14 e 18 de maio cun completo programa de actividades dirixidas a todos os públicos. Trátase dunha das citas festivas máis destacadas do calendario veciñal, con propostas que combinan tradición, música e lecer.
A programación arrancará o xoves 14 coa apertura dos carruseis ás 17:00 horas. Xa pola noite, ás 21:30 horas, haberá unha actuación de zumba dirixida por Mila, seguida ás 22:00 horas do pregón, que nesta ocasión correrá a cargo de Manoli Bande. A continuación, ás 22:20 horas, entregarase o Bastón de Ouro de San Isidro 2026, mentres que ás 22:30 horas terá lugar unha solta de globos como símbolo da paz. A xornada pecharase coa actuación da orquestra Charleston Big Band ás 22:45 horas.
O venres 15 comezará cun dos actos máis tradicionais, a misa solemne ás 12:30 horas na parroquia da Milagrosa, acompañada de procesión. Pola tarde, ás 17:00 horas, reabrirán os carruseis e ás 20:00 horas celebrarase o popular campionato de lanzamento de pantuflas, unha das citas máis singulares destas festas. Xa pola noite, a partir das 22:45 horas, será a quenda musical co DJ Goteo e o grupo Beatriz.
O sábado 16 manterase o ambiente festivo desde o mediodía coa apertura dos carruseis ás 12:00 horas, repetindo ás 17:00 horas. A partir das 22:45 horas, o protagonismo será para a música coa actuación do dúo Estrellas e da orquestra Cinema.
O domingo 17 centrarase nas actividades máis lúdicas e sociais, comezando ás 13:00 horas cunha nova sesión de zumba. Ás 13:30 horas terá lugar a sesión vermú coa orquestra Solara, que tamén protagonizará o tardeo ás 19:30 horas.
As festas concluirán o luns 18, dedicado especialmente á infancia. Durante a xornada, abrirán os carruseis ás 12:00 e ás 17:00 horas, e como broche final, ás 20:30 horas, ofrecerase unha degustación gratuíta de chocolate con churros para os máis pequenos.
Como novidade organizativa, a carreira solidaria do colexio Cervantes, coñecida como Memorial Profe Alberto, trasladarase ao domingo 24 de maio a partir das 10:00 horas.