A UNED de Lugo promove o diálogo sobre saúde mental para combater os estigmas
A UNED de Lugo organizará o próximo xoves 29 de outubro a actividade «Saúde mental sen estigmas: o valor de dicir “non estou ben”», unha iniciativa coa que busca fomentar unha visión máis aberta da saúde mental e contribuír a eliminar os prexuízos que aínda rodean os problemas emocionais. A sesión, impartida pola psicóloga clínica Estefanía Díaz Sobrado, celebrarase ás 18:30 horas con motivo do Día Mundial da Saúde Mental, que se conmemora cada 10 de outubro.
O encontro pretende poñer o foco na importancia de recoñecer as propias dificultades, expresar o que se sente e solicitar apoio cando sexa necesario. Aínda que nos últimos anos se produciron avances na sensibilización social, o medo a ser xulgado e a dificultade para mostrar vulnerabilidade seguen a impedir que moitas persoas compartan o seu malestar ou busquen axuda.
Durante a actividade, Díaz Sobrado abordará cuestións como a identificación das emocións, a superación dos estigmas asociados á saúde mental e o papel da escoita, a empatía e o acompañamento. O obxectivo é crear un espazo de reflexión no que estas cuestións poidan tratarse con naturalidade, sen medos nin prexuízos.
A iniciativa prestará tamén atención á realidade da mocidade, que debe afrontar dificultades relacionadas coa presión académica, as relacións sociais, as expectativas de futuro e a influencia das redes sociais. Neste contexto, a educación emocional e a creación de contornas seguras nas que expresar preocupacións considéranse ferramentas fundamentais para a prevención e o benestar.
A UNED de Lugo lembra que coidar a saúde mental require tanto recoñecer o propio sufrimento como aprender a escoitar e acompañar outras persoas sen xulgar nin minimizar as súas dificultades. A eliminación do estigma implica, por tanto, un compromiso colectivo para ofrecer comprensión, respecto e apoio a quen o necesita.
Con esta proposta, o centro universitario reafirma a súa vontade de achegar a formación e a divulgación á sociedade e de contribuír á construción de contornas nas que falar de saúde mental non sexa motivo de vergoña.
A actividade terá lugar o xoves 29 de outubro, ás 18:30 horas, no marco da programación da UNED de Lugo arredor do Día Mundial da Saúde Mental.