A USC lidera un proxecto para optimizar o control da humidade en Palas de Rei
O grupo de investigación de Proxectos e Planificación (PROePLA) da Universidade de Santiago de Compostela (USC) lidera un proxecto pioneiro para desenvolver un sistema de monitorización do control da humidade na biorrefinería que a empresa Bioflytech ten en Palas de Rei. A iniciativa pretende optimizar o proceso de engorde das larvas de mosca soldado negra, unha variable clave para garantir a súa supervivencia, crecemento e rendemento produtivo.
O proxecto, impulsado por Bioflytech a través da súa filial Alfaprogal (Alternative Fats and Proteins of Galicia), aposta pola incorporación de tecnoloxías de visión artificial e sensorización para crear un modelo de apoio á toma de decisións que poida replicarse noutras instalacións. O obxectivo é automatizar o proceso produtivo para incrementar a eficiencia e a sustentabilidade da biorrefinería.
O investigador principal do proxecto e profesor da Escola Politécnica Superior de Lugo, Tomás Cuesta, explica que se trata dun estudo complexo debido ás características da biomasa coa que traballa a empresa. Ao tratarse de seres vivos, factores como a temperatura, a alimentación, a achega de auga ou o seu manexo inflúen directamente no desenvolvemento das larvas. Nesta primeira fase, o equipo céntrase na monitorización da humidade do cultivo para mellorar a toma de decisións sobre o rego.
Segundo sinala o investigador, o curto ciclo de crecemento da mosca soldado negra obriga a actuar con rapidez. Un déficit de auga pode provocar a morte das larvas, mentres que un exceso de humidade detén o seu desenvolvemento. Ademais, o reducido tamaño destes insectos dificulta aínda máis o seguimento do proceso, polo que o reto consiste en identificar un parámetro de referencia que permita establecer un patrón común para decidir cando e como regar os cultivos.
Para conseguilo, nas instalacións de Bioflytech instaláronse termómetros para medir a temperatura ambiental e a temperatura e humidade do cultivo, ademais de sensores e sistemas de visión artificial que recompilan datos cada hora. Esa información analízase mediante programas de machine learning, cruzándoa coas decisións adoptadas durante o proceso de produción para establecer un sistema estandarizado de control do rego e consolidar un modelo de biorrefinería de insectos orientado á obtención de proteínas, graxas e fertilizantes de alta calidade.
Desde Bioflytech destacan que a colaboración coa USC reforza a súa aposta pola investigación, o desenvolvemento e a innovación. O CEO da compañía, Jesús Rodríguez, asegura que contar co respaldo científico da universidade supón un paso importante para consolidar un modelo de produción máis tecnolóxico, sostible e competitivo, con potencial para converterse nunha alternativa estratéxica á gandería tradicional.
O proxecto está financiado a través do programa IGAPE Innova, destinado a fortalecer a capacidade innovadora das empresas galegas, e espérase que os primeiros resultados estean dispoñibles o próximo mes de outubro.