A Xunta impulsa un novo centro de saúde en Becerreá cun investimento superior aos 3,2 millóns
O PPdeG asegurou que, fronte ás mensaxes críticas e aos discursos que cualificou de catastrofistas por parte dos grupos da oposición, existe un Goberno galego que continúa apostando por mellorar os servizos públicos no rural mediante investimentos e actuacións concretas.
Durante unha visita aos terreos nos que está prevista a construción do novo centro de saúde de Becerreá, a deputada do Grupo Parlamentario Popular Encarna Amigo, acompañada polo portavoz popular na localidade, José Fernández Carrete, referiuse á recente adxudicación da redacción do proxecto, un trámite que cualificou como un paso decisivo para materializar unha actuación que contará cun investimento superior aos 3,2 millóns de euros.
Amigo destacou a relevancia desta infraestrutura sanitaria, que definiu como unha das actuacións máis importantes desenvolvidas nos últimos anos tanto para Becerreá como para o conxunto da súa comarca. Segundo explicou, o novo centro de saúde, xunto co Punto de Atención Continuada, converterá o municipio nun referente en materia asistencial.
O edificio terá unha superficie superior aos 2.000 metros cadrados e incluirá consultas de medicina e enfermaría, ademais de espazos específicos destinados á área de pediatría e á atención sanitaria da muller. Entre os novos servizos previstos tamén figuran consultas de traballo social, de hixienista e espazos orientados á docencia.
A deputada popular subliñou que esta nova infraestrutura permitirá prestar unha asistencia sanitaria máis moderna e adaptada ás necesidades actuais, ofrecendo maior comodidade ás persoas usuarias e mellorando tamén as condicións de traballo do persoal sanitario.
Ademais, explicou que a actuación incluirá un reforzo do Punto de Atención Continuada, incidindo en que o Executivo autonómico está a cumprir os seus compromisos con Becerreá e co conxunto da comarca da montaña lucense.
Para Encarna Amigo, a mellor maneira de responder aos retos demográficos que afronta o territorio pasa por garantir servizos públicos de calidade mediante investimentos efectivos e proxectos capaces de transformar a realidade social e territorial.