Aberto o prazo de inscrición para o V Certame Manuel María de Proxectos Teatrais
A Casa-Museo Manuel María vén de abrir o prazo de inscrición para participar no V Certame de Proxectos Teatrais, unha iniciativa que busca promover a creación escénica en lingua galega e difundir a obra do autor chairego.
O certame, que conta coa colaboración de diferentes concellos galegos, deputacións provinciais e a Axencia Galega das Industrias Culturais a través do Centro Dramático Galego, está dirixido a persoas físicas ou xurídicas vinculadas ás artes escénicas que acrediten a súa residencia en Galicia ou que conten con cobertura de produción para desenvolver o proxecto.
Os traballos presentados deberán basearse en textos de Manuel María ou na súa figura, podendo tratarse de adaptacións ou propostas de creación propia inspiradas na súa obra. Ademais, deberán ser orixinais, ter unha duración mínima de 45 minutos e contar cun compromiso de estrea en lingua galega.
A documentación deberá incluír, entre outros aspectos, un proxecto completo e detallado do espectáculo, proposta escenográfica, memoria dramatúrxica, equipo artístico e técnico, así como un orzamento pormenorizado. As candidaturas poderán presentarse por vía electrónica e tamén en formato físico nos termos establecidos nas bases.
O prazo límite para a presentación de proxectos estará aberto ata o 30 de setembro de 2026. Posteriormente, unha comisión de selección formada por profesionais de recoñecido prestixio no ámbito das artes escénicas avaliará as propostas en función da súa calidade, interese, viabilidade e capacidade de difusión.
O proxecto gañador recibirá unha achega económica de 4.200 euros destinada á súa produción, ademais do compromiso de representación en distintos concellos colaboradores. A maiores, a Axencia Galega das Industrias Culturais poderá asumir a coprodución da obra, achegando financiamento adicional.
Con esta nova convocatoria, o certame reafírmase como unha plataforma de apoio á creación teatral en Galicia, impulsando a posta en escena de propostas innovadoras e contribuíndo á proxección da obra de Manuel María no ámbito cultural galego.