ALCER Lugo instalará mesas informativas na Deputación, Concello e HULA polo Día do Doador
ALCER Lugo instalará mesas informativas na Deputación de Lugo, no Concello e no Hospital Universitario Lucus Augusti (HULA) con motivo da celebración do Día Nacional do Doador de Órganos, que terá lugar este mércores 3 de xuño.
A presidenta de ALCER Lugo, María José Otero Díaz, sinalou que no Día Nacional do Doador de Órganos se quere agradecer profundamente a xenerosidade de todas as persoas doantes e das súas familias. Lembrou que nos inicios do movemento ALCER, hai 50 anos, había moitos doantes e poucos transplantes, e que na actualidade, grazas ao esforzo colectivo, existen infraestruturas que permiten que ninguén quede sen transplante, aínda que advertiu de que a cultura da doazón se está a debilitar na sociedade.
Nese sentido, destacou que, se se quere acadar o obxectivo de chegar a listas de espera cero, é necesario recuperar o espírito social dos anos 70 e promover a participación cidadá, achegándose ás mesas informativas e integrando a doazón na vida diaria.
Otero subliñou ademais que España continúa sendo un referente mundial en doazón e transplantes, grazas a un modelo baseado na coordinación, na excelencia dos profesionais sanitarios e na conciencia social da poboación. Con todo, advertiu de que non se pode perder de vista ás máis de 5.000 persoas que seguen agardando por un órgano.
A campaña deste ano, impulsada pola Unión de Trasplantados de Órganos Sólidos (UTxS) co apoio da Organización Nacional de Transplantes (ONT), leva por lema “Dalle un LIKE á VIDA. Dona órganos, regala futuros”, e busca homenaxear ás persoas doantes e ás súas familias, así como sensibilizar sobre a importancia da doazón.
A UTxS reúne diferentes federacións de pacientes, entre elas ALCER, a Federación Española de Fibrose Quística (FEFQ), a Federación Española de Transplantados de Corazón (FETCO) e a Federación Nacional de Enfermos e Transplantados Hepáticos (FNETH).
Desde estas entidades destacan cinco piares do modelo español: o seu liderado mundial sostido, o carácter público e universal do sistema, a coordinación asistencial, o compromiso coa calidade e a alta especialización dos profesionais. Finalmente, reivindican o recoñecemento ao labor dos equipos sanitarios e das familias doantes.
Ademais, no marco desta iniciativa, organizan a carreira solidaria 'Donar é amar' o domingo 7 de xuño.