ALCER Lugo supera as previsións de atención no seu programa de apoio a persoas con enfermidade renal crónica
ALCER Lugo xa atendeu a máis de 65 persoas con enfermidade renal crónica (ERC) a través do seu programa de Atención Social e Nutricional, superando antes da súa conclusión o número de beneficiarios previsto inicialmente para todo o período de execución da iniciativa, comprendido entre xaneiro e agosto de 2026.
O programa forma parte do Plan de Prioridades da Confederación Española de Persoas con Discapacidade Física e Orgánica (COCEMFE) e conta co financiamento da Fundación ONCE, o que permite á entidade ofrecer un servizo especializado, continuado e próximo ás persoas con enfermidade renal crónica da provincia de Lugo.
Desde ALCER Lugo destacan que a elevada participación rexistrada evidencia a demanda existente deste tipo de recursos e pon de manifesto a necesidade de seguir promovendo programas de atención especializada dirixidos a este colectivo.
A iniciativa ten como finalidade ofrecer unha atención integral tanto ás persoas con enfermidade renal crónica como ás súas familias, combinando a intervención social coa atención nutricional, dous ámbitos considerados fundamentais para mellorar o benestar, favorecer a autonomía persoal, reforzar a adherencia aos tratamentos e contribuír a unha mellor calidade de vida.
No ámbito do traballo social, o programa inclúe unha avaliación individualizada da situación de cada persoa usuaria, ofrecendo información, orientación e asesoramento sobre recursos sociais, sanitarios e prestacións dispoñibles. Ademais, préstase apoio na tramitación de axudas e recursos, acompáñase ás persoas nas diferentes etapas da enfermidade e mantense unha coordinación constante cos profesionais e administracións implicadas para garantir unha atención adaptada ás necesidades de cada paciente e da súa contorna familiar.
Pola súa banda, o Servizo de Nutrición realiza un seguimento dietético personalizado, adaptado tanto ás distintas fases da enfermidade renal como ás características específicas de cada persoa. Este acompañamento busca mellorar o estado nutricional, facilitar o cumprimento dos tratamentos, reducir o risco de complicacións e fomentar hábitos de vida saudables que contribúan a retardar a evolución da enfermidade.
Como complemento á atención individualizada, ao longo do desenvolvemento do proxecto tamén se levaron a cabo actividades de educación para a saúde e promoción do autocuidado, co obxectivo de proporcionar ás persoas participantes coñecementos e ferramentas que lles permitan afrontar a enfermidade con maior autonomía, seguridade e capacidade para tomar decisións sobre o seu proceso asistencial.