Alertan do grave deterioro do firme da Avenida da Coruña e reclama unha reparación inmediata
A Asociación de Veciños, Comerciantes e Industriais da Milagrosa trasladou a súa preocupación polo estado do firme da Avenida da Coruña, unha das principais arterias viarias de Lugo e unha vía de especial importancia para a mobilidade da cidade.
Segundo denuncia a entidade, á altura aproximada da metade da avenida mantense desde hai máis de catro meses un bache de grandes dimensións que, lonxe de ser solucionado, foi empeorando co paso do tempo. A situación estaría provocando golpes e posibles danos nos vehículos, ademais de manobras bruscas por parte dos condutores para evitar o socavón.
A asociación considera que o deterioro da calzada está a xerar tamén unha sensación de inseguridade entre as persoas que utilizan diariamente esta vía, que soporta o tránsito de veciños, traballadores, transportistas e clientes dos establecementos comerciais da zona.
Desde a entidade cuestionan que unha avenida "de tal importancia para a mobilidade de Lugo" permaneza durante tanto tempo nestas condicións sen unha actuación que permita recuperar unhas condicións adecuadas de circulación. Neste sentido, cualifican de "inacción evidente" a falta de intervención por parte do actual Goberno municipal.
A Asociación de Veciños, Comerciantes e Industriais de A Milagrosa reclama á Concellería de Vías e Obras que actúe "de inmediato" e proceda á reparación do firme para eliminar o bache. A entidade considera que este punto se converteu nun exemplo do estado de abandono e falta de mantemento que, ao seu xuízo, afecta a esta zona da cidade.
A asociación defende que a veciñanza debe contar con rúas seguras, transitables e correctamente conservadas e reclama que non se prolongue unha situación que, segundo sinala, supón riscos para as persoas usuarias da Avenida da Coruña.