Alma Selene leva a poesía de Lorca á Taberna Cultural A Despensa de Saa
A Taberna Cultural A Despensa de Saa acollerá o vindeiro sábado 28 de marzo ás 20:15 un recital da soprano Alma Selene, quen presentará o espectáculo “Cantando a Lorca”, unha proposta musical na que revisita a obra do poeta andaluz desde unha perspectiva contemporánea.
A artista, especializada na obra de Federico García Lorca, interpretará unha selección de poemas do autor que serán reinterpretados con arranxos que combinan o jazz con influencias do aire andaluz. O repertorio incluirá pezas inspiradas en títulos destacados como Romancero gitano, Poeta en Nueva York, Seis poemas galegos e tamén fragmentos do seu teatro.
Este concerto forma parte dos proxectos artísticos que Alma Selene leva anos desenvolvendo arredor da figura de Lorca, afondando na musicalidade e na expresividade dos seus textos, nun formato íntimo que busca conectar directamente co público.