Antas de Ulla celebrou os 30 anos de Fiadeira cunha xornada de música, tradición e emoción
Antas de Ulla celebrou esta fin de semana o 30 aniversario de Fiadeira cunha xornada festiva que reuniu música, tradición e veciñanza na rúa Miguel Ángel Blanco. A celebración converteuse nun recoñecemento á traxectoria dunha agrupación que leva tres décadas vinculada á cultura e ás tradicións galegas.
Un dos momentos destacados da xornada foi a inauguración dun mural conmemorativo, nun acto no que tamén participou a alcaldesa de Antas de Ulla, Pilar García Porto, que compartiu coa veciñanza os diferentes momentos da celebración.
A música foi unha das grandes protagonistas da tarde-noite, con actuacións da Banda Grileira, das Pandeireteiras de Fiadeira e de A Compañía Galega de Bailables. A programación completouse con petiscos e diferentes momentos de convivencia entre as persoas participantes.
A celebración serviu tamén para poñer en valor o traballo desenvolvido ao longo destes 30 anos por todas as persoas que forman ou formaron parte de Fiadeira, así como a súa contribución á conservación e difusión da música, a cultura e a tradición galega.
A xornada contou cunha ampla participación da veciñanza, que se sumou a esta celebración para acompañar a agrupación nun aniversario especial e reivindicar a continuidade dunha traxectoria ligada á cultura popular de Antas de Ulla.