Antas de Ulla inaugurará este domingo o Parque Central do Centro Xeográfico de Galicia cunha gran celebración popular
O Concello de Antas de Ulla celebrará este domingo, 28 de xuño, a inauguración oficial do Parque Central do Centro Xeográfico de Galicia cunha gran festa aberta á cidadanía. O novo espazo, situado en Nugallás, na parroquia de Santiz de Amarante, nace coa intención de converterse nun lugar de encontro, convivencia, cultura e lecer con vocación de referencia para todo o territorio galego.
A programación dará comezo ás 18:00 horas coa saída dos autobuses gratuítos desde a Praza do Concello, un servizo habilitado para facilitar a asistencia á celebración. O regreso está previsto ás 22:30 horas desde o propio Parque Central unha vez rematadas as actividades programadas.
A recepción de autoridades e convidados desenvolverase ás 18:30 horas e será seguida polo corte da cinta inaugural, o descubrimento da placa conmemorativa e as intervencións institucionais. Nesta parte do acto intervirán a alcaldesa do municipio e a presidenta da Deputación de Lugo.
Unha vez concluída a parte oficial, ás 19:00 horas, dará comezo a programación cultural da xornada. As actuacións arrancarán ás 19:15 horas coa participación da Coral Polifónica Sons do Farelo. Posteriormente será a quenda da Asociación Cultural Fiadeira ás 19:45 horas e da Escola Banda de Música de Antas de Ulla ás 20:15 horas.
A partir das 20:45 horas abrirase a zona gastronómica coa degustación gratuíta de petiscos elaborados con produtos de proximidade, acompañada pola participación de Sergio Alba. Con esta iniciativa búscase poñer en valor a riqueza agroalimentaria do territorio e ofrecer unha experiencia máis ampla ás persoas asistentes.
A xornada rematará cun concerto do grupo Treixadura, previsto para as 21:30 horas, que servirá como peche dunha celebración que o Concello considera un momento histórico para o municipio.
Desde a administración local sinalan que esta inauguración simboliza a aposta polo desenvolvemento territorial, a dinamización cultural e a creación de novos espazos de convivencia ao servizo da cidadanía. A entrada será libre e gratuíta ata completar o aforo.