Arroxo acusa a Candia de deixar Fontiñas sen un aparcadoiro "moi necesario"
O BNG de Lugo destaca que a Xunta de Galiza "perdeu outra oportunidade" para crear un novo aparcadoiro en Fontiñas, despois de trascender que o propietario da parcela ubicada na unión da rúa Primavera co carril das Hortas e o carril das Flores planifica a construcción de vivenda. Arroxo afirmou que "a Xunta podía utilizar as mesmas ferramentas legais" que se utilizaron na Avenida Breogán para construír este estacionamento e destacou que "pasaron máis de tres anos desde que Rueda anunciou a construción dun aparcadoiro en Fontiñas sen que se dese ningún paso".
O BNG puxo o foco na "mala planificación" por parte da Xunta, ao destinar arredor dun millón de euros á construción dun aparcadoiro "nunha zona onde xa existe ampla dispoñibilidade de prazas", lembrou Arroxo.
A proposta elaborada polo BNG consistía en crear un estacionamento de dúas alturas, aproveitando o desnivel existente entre a rúa Primavera e o Carril das Hortas, o que permitiría "optimizar o uso do espazo e ofrecer preto de cen novas prazas de aparcadoiro". Habilitaríase unha nova infraestrutura que podería contar cun espazo de 3.000 metros cadrados repartidos en dúas plantas que engadirían máis de 100 prazas de estacionamento á zona.
Rubén Arroxo lembrou que a actuación podería desenvolverse mediante os mesmos instrumentos que empregou a Xunta para executar o aparcadoiro da avenida Breogán, declarando o proxecto de interese autonómico. "Se a Xunta quixese, podería facelo tamén aquí, porque dispón da lexislación necesaria para intervir neste tipo de solos", subliñou Arroxo.