As festas de San Vitorio en Baralla celebraranse do 22 ao 29 de agosto cun amplo programa musical
Baralla xa quenta motores para as festas de San Vitorio 2026, que se desenvolverán entre os días 22 e 29 de agosto cun programa no que a música, as tradicións e as actividades populares volverán ser as protagonistas.
A programación arrancará o sábado 22 de agosto coa tradicional romaría campestre nas beiras do río Neira, na área recreativa de Baralla. A xornada contará coas actuacións da charanga Leña Verde, o Dúo Caché, a Disco Móbil DBC e o Dúo Marineda.
As celebracións continuarán o mércores 26 de agosto cun campionato de tute na praza e unha tarde-noite amenizada polos Airiños do Neira, unha sesión de toxo queimado, a actuación do DJ Cutelo e a verbena coa orquestra Charleston.
O xoves 27 de agosto terá lugar a misa solemne e a procesión na honra de San Vitorio. A programación completarase cun concerto dos Airiños do Neira, sesión vermú co Dúo Eclipse, o espectáculo do showman Roberto e Lolo, pasacalles coa charanga Louband e unha gran verbena protagonizada por Dani Pardo, Los Satélites e La Fórmula.
O venres 28 de agosto repetirase a celebración relixiosa con misa e procesión, seguida dun concerto dos Airiños do Neira. Pola tarde actuarán Pakolas e a súa banda e a charanga Mekánica Rolling Band, mentres que a verbena correrá a cargo de Punto Clave e Gran Parada.
As festas rematarán o sábado 29 de agosto cunha nova verbena na que actuarán Jaque e o grupo Lágrimas Desordenadas, coñecido polo seu tributo a Melendi.