As obras para reparar os danos dos temporais nas estradas estatais de Lugo encaran a súa recta final
As actuacións de emerxencia para reparar os danos causados polos temporais deste inverno na rede estatal de estradas da provincia de Lugo atópanse xa na súa fase final. Os traballos céntranse na rehabilitación de firmes deteriorados en distintos tramos da A-6, A-8, N-VI, N-540, N-547, N-634, N-640 e N-642, co obxectivo de reforzar a seguridade viaria e mellorar as condicións de circulación.
As obras inclúen o fresado e a reposición do firme nos puntos que presentan un maior nivel de desgaste, adaptando a intervención ás necesidades de cada tramo. Ademais, unha vez rematada a renovación do pavimento, procederase á reposición da sinalización horizontal afectada polos traballos.
Estas actuacións forman parte do Plan Especial de Reparación e Conservación de Estradas do Estado en Galicia, impulsado para facer fronte ás consecuencias do tren de borrascas que afectou á comunidade nos últimos meses e que provocou danos en diferentes infraestruturas viarias.
A subdelegada do Goberno en Lugo, Olimpia López, visitou un dos puntos nos que se están a desenvolver estas intervencións, na N-VI ao seu paso pola cidade de Lugo. Durante a visita destacou o esforzo realizado polo Ministerio de Transportes e Mobilidade Sostible para recuperar o estado das estradas afectadas polos temporais e garantir a mobilidade da cidadanía.
Segundo indicou, o investimento destinado a estas actuacións na provincia de Lugo ronda os dez millóns de euros. Ademais, sinalou que este plan responde ao compromiso do Goberno de España de actuar nas infraestruturas que o precisen para manter unha rede viaria segura, moderna e adaptada ás necesidades actuais dos usuarios.