As reformas do Anxo Carro de Lugo encaran a recta final coa vista posta en 2027
As obras de reforma do estadio Anxo Carro avanzan cara á súa conclusión, prevista para comezos de 2027. O delegado territorial da Xunta en Lugo, Alfonso Villares, reuniuse con representantes da directiva do CD Lugo e da empresa adxudicataria para comprobar o estado de execución dos traballos, que contan cun investimento total superior aos 3,6 millóns de euros.
Segundo a información trasladada durante a xuntanza, as actuacións nas bancadas norte e oeste están practicamente rematadas. Na nova bancada fixa da zona sur só quedan pendentes algúns remates da instalación eléctrica, mentres que na zona leste continúan os traballos nos baños, no bar e noutros espazos comúns. Unha vez concluídos, procederase á substitución da cuberta.
Tamén finalizaron as obras de ampliación das escaleiras e dos corredores, unha intervención destinada a mellorar a seguridade e a accesibilidade en todo o complexo deportivo.
O pintado das instalacións e a substitución dos actuais asentos de plástico levaranse a cabo na fase final das obras, cuxo remate está previsto para comezos do próximo ano.
No exterior do estadio continúa a instalación do revestimento metálico de cor vermella que cubrirá todo o perímetro do Anxo Carro. Esta actuación permitirá renovar a imaxe do recinto e dotala dunha estética máis moderna e homoxénea.
Para completar a reforma, o proxecto de orzamentos da Xunta para 2027 inclúe unha partida de 1,2 millóns de euros. Esta cantidade permitirá culminar unha intervención que supera os 3,6 millóns de euros de investimento total.