Auxilia Lugo denuncia que a nova rampla do Edificio Sindical segue sen garantir unha accesibilidade segura
Auxilia Lugo considera que as obras realizadas no Edificio Sindical de Lugo, situado na Rolda da Muralla, supoñen un avance na eliminación das barreiras arquitectónicas, pero advirte de que a nova rampla de acceso aínda non garante unha accesibilidade segura e autónoma para todas as persoas con mobilidade reducida. A asociación reclama que se corrixan os problemas detectados para que o edificio poida ser utilizado en igualdade de condicións os 365 días do ano.
A entidade lembra que a súa reivindicación comezou tras recibir a queixa dunha cidadá usuaria dunha cadeira de rodas que, ao acudir a votar no Edificio Sindical, tivo que exercer o seu dereito ao voto na rúa ao non poder acceder ao interior. Naquel momento, o inmoble dispoñía unicamente dun montacargas que levaba anos sen funcionar e que, segundo denuncia Auxilia Lugo, chegara incluso a utilizarse como papeleira.
Tras coñecer esa situación, a asociación iniciou diversas xestións para identificar a administración responsable do edificio e reclamou que deixase de funcionar como colexio electoral mentres non fose plenamente accesible. Esa petición prosperou e, nas últimas eleccións, o inmoble xa non foi utilizado con ese fin. Para Auxilia Lugo, manter un colexio electoral inaccesible supoñía unha situación discriminatoria para as persoas con discapacidade.
Con todo, a entidade sempre defendeu que o problema ía moito máis alá das xornadas electorais. O Edificio Sindical alberga as sedes de distintas organizacións sindicais, así como servizos públicos como o de valoración médica, polo que considera imprescindible que sexa accesible de forma permanente. Durante estes anos, a asociación realizou un seguimento continuado da situación e promoveu distintas protestas e reivindicacións para reclamar unha solución definitiva.
Unha vez rematadas as obras, representantes de Auxilia Lugo desprazáronse ata o edificio para avaliar a nova rampla. A súa conclusión é que, aínda que a actuación supón un paso adiante, presenta importantes deficiencias. Segundo explican, a forte pendente fai practicamente imposible que unha persoa usuaria dunha cadeira de rodas manual poida utilizala de maneira autónoma, xa que a cadeira pode adquirir velocidade e existe o risco de impactar contra o muro que separa a rampla das escaleiras se non é freada.
A entidade tamén advirte de que o pavimento instalado non é antiescorregadizo, polo que tanto as rodas das cadeiras como as persoas acompañantes poden esvarar durante o percorrido. Ademais, sinala que o día da súa visita o chan xa presentaba sucidade, polo que considera que a situación pode agravarse aínda máis cando chova e a superficie estea mollada.
Desde Auxilia Lugo anuncian que continuarán trasladando estas deficiencias ás administracións competentes para que sexan corrixidas. A asociación insiste en que a accesibilidade non consiste simplemente en eliminar barreiras arquitectónicas, senón en garantir que todas as persoas poidan acceder aos edificios públicos con seguridade, autonomía e en igualdade de condicións. "A accesibilidade non é un privilexio nin un favor, é un dereito", conclúe.