Cántigas e Frores celebrará os días 8 e 9 de maio unha nova edición da Feira do 48
A Asociación Cultural Cántigas e Frores organizará un ano máis a Feira do 48, unha cita xa consolidada no calendario cultural galego que se celebrará os días 8 e 9 de maio de 2026 con dúas xornadas dedicadas á música, ao baile, á artesanía e ás tradicións populares.
O evento volverá reunir ás escolas da entidade, aos grupos oficiais, artesáns e agrupacións convidadas nun programa pensado para converterse nun punto de encontro arredor da cultura tradicional galega.
A feira ten como principal obxectivo poñer en valor o patrimonio inmaterial de Galicia a través das diferentes actividades protagonizadas polas escolas e polos colectivos vinculados á asociación, que conta cunha ampla traxectoria no labor de recuperación, conservación e difusión das tradicións populares.
Durante as dúas xornadas haberá propostas centradas na música tradicional, concertos, exhibicións de baile e espazos dedicados á artesanía, combinando participación e divulgación cultural.
Desde a organización avanzaron que nos próximos días irán dando a coñecer novos detalles sobre a programación prevista para esta edición.