Carmen Peñamaría Ramón presenta en Lugo a súa novela "Un paseo xunto ao mar"
A escritora Carmen Peñamaría Ramón presentará este sábado, 12 de setembro, en Lugo a súa nova obra, "Un paseo xunto ao mar", nun acto que terá lugar ás 12:00 horas na Libraría Trama, situada na avenida da Coruña, número 21. A presentación contará con entrada de balde.
A novela sitúa a súa protagonista, Marta, nun momento no que xa non espera nada da vida, ata que o achado dun bolso abre unha fenda na súa rutina e a conduce a un lugar no que o tempo parece deterse e persoas que marcharon volven falar.
"Un paseo xunto ao mar" está editada por Universo de Letras e combina a historia persoal da protagonista cunha trama na que o paso do tempo, os encontros e os recordos adquiren un papel destacado.
O encontro coa autora desenvolverase na Libraría Trama de Lugo e permitirá coñecer de primeira man a nova publicación de Carmen Peñamaría Ramón.