Castroverde amplía o parque infantil do CPI Plurilingüe con novos xogos
O parque infantil do CPI Plurilingüe de Castroverde conta con novos elementos de xogo tras a actuación realizada polo Concello, que destinou preto de 12.500 euros á ampliación deste espazo. A intervención permite aos nenos e nenas dispoñer dunha zona de lecer máis ampla e adaptada para xogar e desenvolver as súas capacidades.
Os traballos incluíron a instalación de dous novos elementos que se incorporan aos xogos que xa había no parque. Un deles é un xogo de trepa, deseñado para favorecer o desenvolvemento da coordinación e das habilidades motrices dos máis pequenos.
O segundo elemento é unha locomotora, que incorpora unha nova zona destinada ao xogo simbólico e á imaxinación. Con estas incorporacións, o espazo infantil amplía as súas posibilidades de uso e ofrece novas alternativas de diversión.
A actuación permite contar cun parque máis completo nun contorno seguro e adaptado ás necesidades dos nenos e nenas do centro educativo.
A ampliación forma parte das intervencións realizadas polo Concello de Castroverde nas instalacións do CPI Plurilingüe, co obxectivo de mellorar os espazos do centro e contribuír ao benestar do alumnado.