Eventos | Axenda

As celebracións, que se desenvolverán do 23 ao 26 de xullo, incluirán actuacións musicais, actos relixiosos, xogos infantís, pasarrúas e fogos artificiais

Castroverde xa quenta motores para a celebración das Festas do Santiago Apóstolo, unha cita que reunirá durante catro días música, tradición, actividades culturais e propostas pensadas para públicos de todas as idades. A programación desenvolverase entre o 23 e o 26 de xullo e combinará concertos, actos relixiosos, actividades infantís e diferentes iniciativas vinculadas á cultura popular galega.

A programación arrancará o 23 de xullo, xornada dedicada á orientación, coa celebración do Orientabirring durante a tarde e coa música como protagonista da noite grazas ás actuacións de D’Cano e París de Noia.

O día 24 será o Día Grande das festas e contará coa actuación de Los Adrianos ao mediodía, ademais da música da Mekanika Rolling Band e dunha das grandes citas musicais das celebracións coa presenza das orquestras Capitol e La Fórmula.

Xa o sábado 25, coincidindo co Día do Patrón, a programación combinará tradición e música coa batucada Tambukda, a misa e procesión relixiosa e a actuación do grupo Acordes. A xornada continuará coa música de Fuego Street Band e coa verbena protagonizada por Acordes e Origen. A medianoite terá lugar a tradicional sesión de fogos artificiais.

As festas pecharanse o domingo 26 coa celebración do Día da Foliada, unha xornada na que a música tradicional terá especial protagonismo. O programa incluirá a actuación de Asubíos da Chaira, a misa, unha sesión de cantos de taberna por distintos puntos da vila, xogos infantís, a actuación da Cé Orquestra Pantasma e os concertos de Punk’on Keixo e De Ninghures.