Castroverde convoca o VI concurso de microrrelatos con premios por valor de 760 euros
O Concello de Castroverde vén de anunciar a convocatoria da sexta edición do seu concurso de microrrelatos, unha iniciativa que repartirá un total de 760 euros en premios e que ten como principal obxectivo promover o uso da lingua galega na creación literaria, ao tempo que impulsa a imaxinación e a capacidade narrativa da cidadanía.
Nesta nova edición, o certame xirará arredor da temática “A lareira dos avós”, convidando ás persoas participantes a construír historias breves que transmitan emoción e significado a través de textos concisos. A organización lembra que un microrrelato debe contar algo pequeno cun fondo relevante, evitando explicacións innecesarias, xuízos de valor ou intencións de condicionar a interpretación do lector, apostando pola suxestión e a evocación.
O concurso está aberto a todas aquelas persoas que desexen participar a partir dos 12 anos. No caso de menores de idade, será necesario contar coa autorización expresa de quen exerza a súa tutela legal. As obras deberán estar escritas en galego, ser orixinais e inéditas, e non ter sido premiadas nin presentadas simultaneamente noutros certames.
Os microrrelatos deberán enviarse por correo electrónico á dirección microrrelatos.castroverde@gmail.com, indicando no asunto “VI Concurso de microrrelatos do Concello de Castroverde”. A documentación terá que remitirse en dous arquivos PDF diferenciados: un primeiro documento co texto do microrrelato, sen sinatura e cunha extensión de entre 100 e 200 palabras, e un segundo cos datos persoais da persoa autora, incluíndo nome e apelidos, copia do NIF, dirección postal, correo electrónico e teléfono. A organización advirte que serán excluídos aqueles envíos que inclúan datos persoais no título dos arquivos.
O prazo para presentar os traballos permanecerá aberto ata o 17 de maio de 2026. Un xurado formado por persoas especializadas en materia lingüística será o encargado de avaliar os textos, tendo en conta aspectos como a corrección ortográfica e gramatical, a adecuación á temática proposta, así como a creatividade, a orixinalidade e a calidade literaria.
O fallo do xurado será inapelable e poderá declarar desertos os premios se considera que ningunha das obras acada o nivel esixido. A resolución comunicarase telefonicamente ás persoas gañadoras e tamén se fará pública na páxina web e nas redes sociais municipais, onde se darán a coñecer os microrrelatos premiados xunto coa identidade das súas autoras ou autores.
As bases tamén establecen que quedarán fóra do concurso aqueles textos que vulneren dereitos fundamentais, conteñan mensaxes discriminatorias ou atenten contra a dignidade das persoas, a moral ou a orde pública.
En canto aos galardóns, establécense catro premios: un primeiro de 400 euros, un segundo de 200 euros, un terceiro de 100 euros e un cuarto premio dotado con 60 euros.