Castroverde e Baleira realizarán o 27 de maio un simulacro de incendio forestal
O Concello de Castroverde anunciou a realización dun simulacro de incendio forestal que terá lugar ao longo da mañá do 27 de maio de 2026, unha actividade que se estenderá tamén ao municipio de Baleira e que ten como obxectivo principal comprobar e mellorar a coordinación entre os diferentes corpos e servizos implicados na xestión de emerxencias.
Durante a xornada, as parroquias de Riomol, Masoucos, A Frairía, Vilalle, Vilabade, Montecubeiro e Bolaño veranse afectadas pola práctica, que reproducirá unha situación de risco real para poñer a proba os protocolos de actuación fronte a un incendio forestal.
Segundo se indica no bando municipal, esta operación implicará un importante despregue de medios humanos e materiais nas zonas sinaladas, aínda que se fai un chamamento á veciñanza para manter a tranquilidade, xa que non se trata dun suceso real. A poboación poderá continuar co desenvolvemento normal das súas actividades durante o exercicio.
A iniciativa busca mellorar a capacidade de resposta e a coordinación entre os distintos dispositivos de emerxencia ante situacións de incendios forestais, un risco habitual na zona durante os meses de maior temperatura.