Centos de persoas apoiaron en Lugo a Ceuta mentres unha contramanifestación denunciou o racismo
Centos de persoas concentráronse este xoves, 2 de setembro ás 20.00 horas, diante da Casa Consistorial de Lugo para expresar o seu apoio á cidadanía de Ceuta tras a entrada masiva de inmigrantes procedentes de Marrocos. Baixo o lema "Ceuta non se vende, Ceuta deféndese", os asistentes entoaron cánticos de carácter patriótico e corearon en numerosas ocasións o "Viva España".
A concentración foi promovida pola Federación Española de Municipios y Provincias (FEMP) e contou co apoio do Partido Popular. En Lugo, o manifesto foi lido polo presidente local dos populares, Ramón Carballo, que centrou a súa intervención na defensa de Ceuta e de España como país e como fronteira de Europa.
A convocatoria xa provocara críticas nos días previos. O PSdeG expresara o seu rexeitamento á mobilización, mentres que Podemos Lugo tamén manifestara a súa oposición a "calquera manifestación con ton racista".
Neste contexto, decenas de persoas participaron nunha contramanifestación convocada por Galiza Nova na parte esquerda da Praza Maior, no lado do Círculo das Artes, para expresar o seu rexeitamento a calquera comportamento racista por parte das persoas concentradas diante da Casa Consistorial.
A presenza simultánea de ambas as mobilizacións provocou momentos de tensión entre os participantes, con insultos e xestos ofensivos. A situación non derivou en incidentes de maior gravidade, aínda que foi necesaria a intervención da Policía Nacional en varios momentos para separar os integrantes de ambos os grupos e evitar que a situación fose a máis.