De Ninghures pechará as Festas do Santiago de Castroverde cun concerto o domingo
O grupo De Ninghures actuará este domingo, 26 de xullo, na Praza do Concello de Castroverde dentro da programación musical impulsada pola Vicepresidencia da Deputación de Lugo para achegar a música tradicional e en galego a todos os públicos. O concerto, previsto para as 21.30 horas, servirá como peche das Festas do Santiago.
A banda, con raíces na Fonsagrada, consolidouse como unha das formacións de referencia da música galega actual grazas a unha proposta que revisita a tradición a través da combinación de instrumentos populares con influencias e ritmos contemporáneos.
A deputada de Cultura, Iria Castro, explicou que esta actuación contribúe a ampliar e diversificar a oferta musical das festas e, ao mesmo tempo, permite achegar a música en galego inspirada na tradición a públicos de todas as idades, máis alá dos grandes festivais ou dos principais eventos culturais.
Neste sentido, destacou a importancia de que a cidadanía participe do momento creativo que vive a música tradicional galega da man de grupos como De Ninghures, lembrando ademais a vinculación da formación coa comarca da Fonsagrada.
A programación das Festas do Santiago contará tamén con outras actividades apoiadas pola Área de Cultura da Deputación de Lugo, entre elas o espectáculo infantil Cé Orquestra Pantasma, as actuacións itinerantes da Mekanika Rolling Band e a música tradicional de Asubíos da Chaira, configurando unha oferta cultural dirixida a públicos de todas as idades.