Elena Candia reivindica os investimentos da Xunta para transformar Lugo en 2027
A alcaldesa de Lugo, Elena Candia, destacou que os Orzamentos da Xunta de Galicia para 2027 avalan o modelo de cidade que impulsa o goberno local, cunha aposta polas infraestruturas e polos servizos públicos. A rexedora puxo o foco nas partidas previstas para actuacións viarias, equipamentos sanitarios e educativos e recursos de atención social, así como no avance de proxectos que, segundo sinalou, permanecían bloqueados.
A líder do PP de Lugo, en contraposición co PSOE, asegurou que o actual goberno municipal conseguiu desbloquear iniciativas que figuraban en exercicios orzamentarios anteriores sen avanzar. Entre elas citou a ampliación da protectora de animais, o parque canino de Fontiñas, as obras da Serra de Meira e o proxecto de abastecemento e saneamento de Esperante. Tamén destacou os pasos dados para impulsar o futuro centro de saúde do Sagrado Corazón, para o que se prevén 600.000 euros destinados á contratación do proxecto nos terreos xa propiedade municipal.
Investimentos en infraestruturas e servizos
Entre as principais partidas recollidas nos orzamentos autonómicos figuran 7,9 millóns de euros para o corredor Nadela-Sarria e dous millóns para avanzar na rolda Leste durante 2027. A actuación da Serra de Meira, vinculada ao Plan Paradai, conta cunha previsión de 516.176 euros.
Os investimentos inclúen tamén 248.200 euros para a protectora de animais entre 2026 e 2027, 1,2 millóns para a ampliación do estadio Anxo Carro e 126.993 euros para o proxecto de abastecemento e saneamento na N-540, en Esperante.
No ámbito sanitario, ademais dos 600.000 euros para o proxecto do centro de saúde do Sagrado Corazón, prevese destinar máis de 1,6 millóns á segunda fase do acelerador lineal do HULA e 870.000 euros á reforma integral do centro de saúde da Milagrosa. Tamén se contempla incorporar recursos de saúde mental ao edificio sen uso do barrio da Residencia para ampliar a atención neste ámbito.
Educación, atención social e vivenda
En educación, os orzamentos inclúen 1,3 millóns de euros para continuar a rehabilitación integral do CEIP de Nadela, 483.400 euros para a ampliación do IES Muralla Romana e 180.000 euros para o CIFP As Mercedes. A estes investimentos súmanse a gratuidade das escolas infantís, da que se benefician máis de 1.300 nenos e nenas en Lugo, cun investimento aproximado de tres millóns de euros, e os 4,7 millóns destinados á acreditación de excelencia do Campus Terra no período 2025-2029.
A atención social concentra máis de nove millóns de euros para o Bono Coidado no Fogar, que chega a 1.800 beneficiarios, 3,34 millóns para o Servizo de Axuda no Fogar e un millón para continuar as obras nas residencias públicas das Gándaras e da Milagrosa.
En materia económica, prevese unha partida de 100.000 euros para a ampliación do polígono das Gándaras, que contará con máis de dous millóns de metros cadrados de superficie. No ámbito residencial, Candia destacou os investimentos autonómicos en vivenda de nova construción e solo residencial, así como o desenvolvemento de máis de 600 vivendas de protección pública na cidade. Tamén está prevista a aprobación definitiva do PIA do Sagrado Corazón, cunha partida de 1,9 millóns de euros.
A alcaldesa concluíu que o goberno local continuará traballando para completar os trámites pendentes e converter os compromisos orzamentarios en actuacións concretas para a cidade.