Fe Núñez presenta o seu poemario 'En sístole' na Despensa de Saa
A escritora Fe Núñez participará nun encontro literario o vindeiro 18 de abril na Despensa de Saa, onde abordará a utilidade da poesía e ofrecerá unha lectura de textos do seu libro En sístole.
A actividade contará coa presentación do poeta Fernando Juan Morado, natural de Mondariz e residente na Coruña, que acompañará á autora neste acto centrado na creación poética e na reflexión arredor da súa función.
Fe Núñez desenvolveu a súa traxectoria profesional como docente en distintas localidades galegas, aínda que foi en Ourense onde residiu durante máis de dúas décadas. Nos últimos tempos regresou á súa aldea natal, onde vive coa súa familia, unha experiencia que a levou a afondar nas súas raíces e a redescubrir a súa contorna máis próxima.
No poemario En sístole, publicado por Medulia Editorial, a autora explora con intensidade esa procura das orixes como vía para avanzar con maior plenitude vital, convertendo a memoria e a identidade en eixos centrais da súa obra.