Friol acollerá este sábado un obradoiro para aprender a identificar e combater a desinformación
O Colexio Profesional de Xornalistas de Galicia organizará este sábado, 7 de novembro, un obradoiro contra a desinformación na Escola de Vilalvite, en Friol. A actividade comezará ás 11:30 horas e estará impartida por Selina Otero Verdes. A asistencia será libre e gratuíta, sen necesidade de inscrición previa, ata completar a capacidade do espazo.
A sesión forma parte do programa de alfabetización mediática para persoas adultas que o Colexio desenvolve en distintos concellos da provincia, cun proxecto subvencionado pola Deputación de Lugo. O obxectivo é ofrecer ferramentas para distinguir o xornalismo de calidade das noticias falsas e aprender a recoñecer e combater a desinformación.
Selina Otero Verdes é licenciada en Xornalismo e está especializada en educación e innovación. Conta con máis de quince anos de experiencia profesional en medios de comunicación e gabinetes de prensa, entre eles Faro de Vigo, onde foi responsable do suplemento educativo Faro da Educación. Ademais, recibiu formación específica en alfabetización mediática para trasladar á cidadanía estratexias eficaces fronte ás noticias falsas.
A iniciativa responde á preocupación polo impacto da desinformación, que afecta tanto ao xornalismo como á calidade democrática da sociedade. O Colexio Profesional de Xornalistas busca así achegar á poboación adulta coñecementos e recursos que lle permitan identificar as mentiras e evitar contribuír á súa difusión.
O programa chegará a un total de 19 concellos da provincia de Lugo, entre eles Friol, e contará coa participación de profesionais colexiados que recibiron formación específica para impartir estes obradoiros.