Galego de Caracas estrea ‘Lugoland’, o seu primeiro sinxelo dedicado ás festas de San Froilán
O artista Simón Rodríguez Landaeta, coñecido como Galego de Caracas, estreou este 5 de outubro, día de San Froilán, o primeiro videoclip do seu proxecto musical. O artista lucense-venezolano leva varios anos desenvolvendo unha traxectoria destacada na escena cultural galega, con premios literarios, presentacións de poesía escénica e actuacións musicais.
Despois de apostar pola creación en galego en diferentes ámbitos artísticos, Galego de Caracas dá agora o paso definitivo no eido musical coa publicación do seu primeiro sinxelo, ‘Lugoland’. A canción relata unha fin de semana de esmorga en Lugo durante as festas de San Froilán e combina trap e electrónica con sons de feira, cunha proposta pensada para bailar e saltar.
O tema foi gravado, mesturado e masterizado na Cova do Oso Estudio polo enxeñeiro Fidias Torres, mentres que a instrumental foi producida por Horacio Hibirma. A portada do sinxelo foi deseñada polo artista lucense Iván Mouronte, recoñecido tamén pola creación do cartel das Festas do San Froilán de 2025.
O videoclip foi realizado integramente por Daniela Blanco Santos durante o San Froilán de 2025. A edición do traballo prolongouse durante aproximadamente un ano co obxectivo de facer coincidir o lanzamento coas festas de 2026.
Con ‘Lugoland’, Galego de Caracas incorpora unha nova dimensión á súa traxectoria artística e explora a súa faceta máis festiva. O artista, cunha presenza notable na escena cultural galega a través da literatura e da poesía escénica, aborda nesta ocasión a noite lucense, as súas festas e o carácter máis hedonista da cidade que o acolleu.
A canción supón así un crossover entre as diferentes vertentes creativas do artista e unha homenaxe musical a Lugo e ao San Froilán, a través dunha proposta que combina a creación en galego con sons urbanos e electrónicos.