Guntín avanza en melloras de servizos, instalacións municipais e infraestruturas
O Concello de Guntín continúa desenvolvendo diferentes actuacións destinadas á mellora das infraestruturas, os equipamentos públicos e os servizos municipais. Os proxectos en marcha e as necesidades da localidade foron abordados durante unha reunión entre o alcalde, Ángel Pérez, e o delegado territorial en Lugo, Alfonso Villares, que realizou a súa primeira visita institucional ao municipio.
Entre as intervencións realizadas nos últimos tempos figuran as melloras de eficiencia enerxética no pavillón municipal e nas pistas de tenis, así como a adquisición dun punto limpo móbil destinado a reforzar a xestión dos residuos.
Tamén se acometeu a reforma da Casa Cuartel para mellorar as condicións de habitabilidade e confort das instalacións. No ámbito da rede viaria desenvolvéronse actuacións nos accesos a Pradeda de Abaixo e Trastulfe e en diferentes camiños do núcleo de Vilameá.
A estas iniciativas súmase este ano o reacondicionamento e a mellora da accesibilidade dos vestiarios da piscina municipal, unha actuación que conta cunha achega de 36.400 euros.
Guntín tamén adquirirá conxuntamente co Concello do Páramo maquinaria destinada a tarefas relacionadas coa protección do medio ambiente e dos espazos naturais. Para esta iniciativa destínanse 28.890 euros.
Emprego e melloras na N-540
Outro dos proxectos actualmente en desenvolvemento é o obradoiro dual 'Ponte de Areas VIII', compartido polos concellos de Guntín, O Corgo e O Páramo e dotado cun orzamento de 454.552 euros.
No caso de Guntín, os participantes encárganse de acondicionar as beirarrúas ao longo do percorrido da estrada N-540 pola localidade. Desta maneira, o programa combina a formación e a adquisición de experiencia profesional coa execución dunha actuación de interese para o municipio.
No apartado dos servizos sociais, o financiamento destinado ao Servizo de Axuda no Fogar alcanza os 371.000 euros, co obxectivo de atender as necesidades asistenciais da poboación.
Durante a reunión tamén se analizaron as prioridades de futuro do municipio e a necesidade de continuar desenvolvendo proxectos que permitan modernizar os equipamentos públicos, reforzar os servizos e mellorar as condicións de vida da veciñanza, especialmente nun concello de carácter rural como Guntín.