Impulsan un aparcadoiro para vehículos pesados nas Gándaras, unha demanda histórica
O Concello de Lugo aprobou na Xunta de Goberno Local as bases para a concesión dun estacionamento de vehículos pesados nas Gándaras, unha actuación orientada a dar resposta a unha carencia histórica nas principais áreas industriais da cidade.
O alcalde, Miguel Fernández, avanzou esta medida durante un encontro con empresarios das Gándaras e do Ceao, no marco das reunións que o Goberno local mantén co tecido produtivo para analizar necesidades e posibles melloras. Segundo explicou, trátase dunha demanda traballada co sector que supón un avance relevante na mellora dos servizos e na organización do espazo industrial.
A actuación desenvolverase nunha parcela municipal de 44.369 metros cadrados e tramitarase mediante un procedemento aberto en concorrencia pública, cun prazo de 30 días hábiles para a presentación de ofertas.
A concesión terá unha duración de 10 anos, sen opción de prórroga, e fixa un prazo máximo de 18 meses para a posta en funcionamento do estacionamento desde a formalización do contrato. Durante ese período, a empresa adxudicataria deberá redactar o proxecto, obter as licenzas necesarias e executar as obras.
Desde o punto de vista económico, a infraestrutura será asumida integramente pola empresa concesionaria, sen investimento por parte do Concello, e establecerase un canon mínimo anual de 1.600 euros, que poderá ser mellorado polas empresas licitadoras.
O estacionamento deberá prestar servizo de forma continua durante todo o ano, reservar polo menos un 20% das prazas para usuarios en tránsito e cumprir cos requisitos de seguridade establecidos, incluíndo a obtención da correspondente certificación.
En canto ás tarifas, establécese un máximo de 80 euros mensuais para abonados e de 1 euro por hora para usuarios ocasionais, cantidades que poderán ser rebaixadas polas empresas que participen no proceso de licitación.