Leira traerá a Lugo un curso gratuíto de Introdución ao Documental de Creación da ESCAC
Leira será espazo colaborador da prestixiosa Escola de Cine e Audiovisuais ESCAC e acollerá en Lugo un programa formativo de alto nivel 100% subvencionado, é dicir, gratuíto para os participantes.
O curso de Introdución ao Documental de Creación desenvolverase en xaneiro no espazo de Leira en Lugo, dentro da iniciativa OFFESCAC, con certificación propia. Concretamente, o curso celebrarase os días 17, 18, 24, 25 e 31 de xaneiro e 1 de febreiro, en horario de 10:00 a 14:00 horas e de 15:00 a 18:00 horas.
Estará guiado pola cineasta, investigadora e produtora lucense Xiana do Teixero, e contará coa presenza de profesionais do cine e das artes en Galicia.
Trátase dun obradoiro teórico-práctico que se achega ás prácticas máis autorais do documental cinematográfico, no que todos os participantes realizarán creacións audiovisuais e se familiarizarán con etapas clave da produción deste tipo de pezas.