Los Satélites, 9louro e The Rapants poñen música ao martes en Lugo
A programación do San Froilán continuará o martes, 6 de outubro, con música, tradición e actividades para diferentes públicos repartidas por varios espazos de Lugo. A noite estará marcada polos concertos de 9louro e The Rapants na praza do Seminario, mentres que a praza Maior acollerá a verbena da Orquesta Os Satélites.
A programación musical comezará ás 18.00 horas coa actuación de Os Satélites na praza Maior. Ás 20.30 horas, a praza do Seminario recibirá o concerto de 9louro, ao que seguirá, ás 21.45 horas e no mesmo escenario, a actuación de The Rapants. A noite completarase ás 21.00 horas na praza de Santa María co espectáculo DJ Sinfónico Terranova + La Vera Notte.
A música tradicional terá tamén un espazo destacado durante a xornada. Ás 18.00 horas, o escenario da praza de Santa María acollerá Escenario Zanfona, unha proposta con Ailá, Efrén López e Kelly Thoma. Ás 19.00 horas, dentro de X Cultura e Tradición no Camiño, Xisco Feijóo presentará "A voz do esforzo: Cantares do traballo na tradición galega" na Oficina de Turismo da Xunta de Galicia e no Espazo Relembra.
No marco da mesma programación celebraranse ás 11.00 e ás 17.00 horas os talleres de Cestería de Colmo III, impartido por Álvaro M. Leiro, e de Bordado Tradicional de Agremán I, a cargo de Rafael González Goyanes. As actividades terán lugar na Oficina de Turismo da Xunta de Galicia e no Espazo Relembra e requiren inscrición previa no correo traxandaina@gmail.com.
A animación chegará tamén ás rúas da cidade a través de diferentes pasarrúas. Ás 12.00 horas, Caivanca actuará por Recatelo; Cantigas e Frores percorrerá San Marcos, praza de Ferrol, Montevideo e Bolaño Rivadeneira, e Son do Pucheiro estará pola Ronda das Fontiñas. Pola tarde, ás 19.00 horas, Airiños de Orbazai percorrerá o barrio da Ponte, Falso Teito estará en Augas Férreas e Son do Pucheiro actuará polo barrio das Gándaras.
A maxia terá tamén presenza na programación, con "Maxia no San Froilán", a cargo de David Méndez, ás 12.00 horas no patio do Edificio Administrativo do Concello.
Deste xeito, o martes de San Froilán combinará concertos e verbenas con propostas de música tradicional, actividades culturais, maxia e animación nas rúas, cunha programación que se desenvolverá ao longo de toda a xornada.