Lugo acolle en abril as IX Xornadas de Divulgación Científica do Patrimonio Arqueolóxico Lucense
As IX Xornadas de Divulgación Científica do Patrimonio Arqueolóxico Lucense celebraranse os días 10 e 11 de abril no claustro do Museo Provincial de Lugo, un espazo catalogado como Ben de Interese Cultural. O encontro centrará a súa atención neste enclave histórico e nas coleccións arqueolóxicas que alberga.
O programa foi presentado pola deputada de Cultura da Deputación de Lugo, Iria Castro, xunto co vicepresidente da institución provincial, Efrén Castro. No acto tamén participaron a directora do museo, Aurelia Balseiro; a responsable de Arqueoloxía do centro, Ofelia Carnero; e a xerente da Rede Museística Provincial de Lugo, Encarna Lago.
As xornadas están concibidas como un espazo de reflexión, debate e intercambio de coñecemento arredor da historia do claustro e das coleccións arqueolóxicas que conserva. No conxunto expositivo contabilízanse 205 pezas, principalmente capiteis, elementos de heráldica e esculturas de carácter devocional, cunha cronoloxía que abrangue desde o século I ata o XIX.
Baixo o epígrafe “A memoria da pedra”, o encontro toma como fío condutor este material, considerado un soporte da memoria dos canteiros e artistas que participaron tanto na construción do claustro como na elaboración das pezas patrimoniais que se exhiben no recinto.
O programa desenvolverase en formato presencial e tamén en liña. A proposta está dirixida á comunidade científica, pero tamén a estudantes, afeccionados á historia e á arqueoloxía, profesionais de museos, coleccionistas, docentes ou guías turísticos interesados no patrimonio cultural.