Lugo acolle unha nova sesión do ciclo ‘Arredor do té’ para achegar a realidade do pobo saharauí
O Concello de Lugo organiza unha nova edición do ciclo de conversas ‘Arredor do té’, unha iniciativa de sensibilización social promovida pola Área de Política Social, Maiores, Migración, Muller e Conciliación.
A sesión terá lugar o martes 16 de xuño ás 17.00 horas no Centro de Convivencia de Fingoi e estará centrada na realidade do pobo saharauí, con especial atención á situación das persoas refuxiadas nos campamentos de Tinduf, en Alxeria.
Durante o encontro participarán activistas saharauís que compartirán testemuños directos sobre as condicións de vida da poboación refuxiada, así como sobre o papel das mulleres na organización social e na resistencia do pobo saharauí.
A actividade enmárcase na conmemoración do Día das Persoas Refuxiadas e busca fomentar a reflexión sobre os dereitos humanos, a cooperación internacional e a interculturalidade, ao tempo que promove o coñecemento e combate a desinformación.
O ciclo toma o seu nome dunha tradición cultural saharauí, na que o té representa un símbolo de hospitalidade e diálogo, convertido nesta ocasión nun espazo de encontro e sensibilización aberto á cidadanía.