Lugo acolle unha xornada sobre o folclore infantil e a transmisión da memoria a través da tradición oral
A tradición oral na infancia e o seu papel na transmisión da memoria colectiva centrarán a XIX Xornada de Literatura de Tradición Oral, que terá lugar o sábado 24 de outubro no Salón de Actos da Deputación de Lugo, na rúa San Marcos, número 8. A iniciativa, organizada pola Sección de Literatura de Tradición Oral da Asociación de Escritoras e Escritores en Lingua Galega (AELG), leva por título "Palabras de berce: o folclore infantil e a transmisión da memoria".
A programación desenvolverase en horario de mañá e tarde e reunirá especialistas en lingua, literatura oral e cultura popular. A Área de Cultura da Deputación de Lugo apoia a celebración da xornada, que tamén conta coa colaboración de CEDRO e da Asociación Socio-Pedagóxica Galega.
A actividade comezará ás 10:15 horas coa recepción das persoas asistentes, a entrega de material e a inauguración. Media hora despois, Antón Cortizas ofrecerá a conferencia "Enredos coa propia lingua: a palabra tamén é un brinquedo". De 11:30 a 12:30 horas, Lorena Pinheiro impartirá "Cartografía da infancia. Apego e tenrura nos cantos de reis".
A sesión matinal pecharase cunha mesa redonda titulada "Poñerlle palabras á experiencia do mundo", na que participarán Cortizas e Pinheiro, baixo a moderación de Lois Pérez. O debate desenvolverase entre as 12:30 e as 14:00 horas.
Pola tarde, as actividades retomaranse ás 16:00 horas coa intervención de Pavís Pavós, que abordará "A transmisión da tradición oral dende o berce". A continuación, de 17:00 a 18:00 horas, Iria Sobrino Freire falará sobre "Detrás de Pedro Chosco. As voces das mulleres nos arrolos".
A programación continuará cunha mesa redonda sobre "O conto e o canto: o papel da lingua na adquisición do código", na que intervirán Pavís Pavós e Iria Sobrino, coa moderación de Eva Teixeiro. O encontro terá lugar entre as 18:00 e as 19:30 horas.
A xornada rematará cunha sesión práctica, de 19:30 a 20:30 horas, dedicada aos xogos tradicionais como ferramenta de normalización lingüística. A actividade permitirá coñecer a experiencia de XOTRAMU e a contribución destes xogos á transmisión da lingua e da cultura popular entre as novas xeracións.