Lugo acollerá a exposición 'O río que nos move' sobre o histórico descenso do Miño
A Asociación Cultural 40 anos do descenso do Miño organiza a apertura da exposición 'O río que nos move. En canoa polos 317 km do pai Miño', unha proposta que recupera a memoria do primeiro descenso completo do gran río galego realizado no ano 1985.
A mostra recolle unha selección de fotografías daquela aventura protagonizada por cinco mozos que percorreron o Miño en canoas feitas por eles mesmos. A través destas imaxes, a exposición non só revisita aquela experiencia pioneira, senón que tamén propón unha reflexión sobre o estado actual do río e o seu enorme potencial natural e cultural.
O acto de inauguración terá lugar o 8 de maio de 2026 ás 19:00 horas no Vello Cárcere de Lugo, na sección de mulleres, e incluirá un coloquio aberto ao público.
A iniciativa conta coa colaboración de distintas entidades e busca poñer en valor o patrimonio fluvial galego, así como fomentar a conciencia ambiental arredor do Miño.