Lugo acollerá a exposición 'O río que nos move' sobre o histórico descenso do Miño
A Asociación Cultural 40 anos do descenso do Miño organiza a apertura da exposición 'O río que nos move. En canoa polos 317 km do pai Miño', unha proposta que recupera a memoria do primeiro descenso completo do gran río galego realizado no ano 1985.
O Vello Cárcere de Lugo acollerá o 8 de maio ás 19:00 horas o acto inaugural da exposición, que terá lugar na sección de mulleres e contará cun coloquio aberto ao público. A iniciativa busca achegar á cidadanía unha experiencia singular vinculada ao río Miño e fomentar o debate arredor da súa situación e das oportunidades que ofrece.
A mostra reúne unha escolma de fotografías dunha aventura protagonizada en 1985 por cinco mozos do Baixo Miño, que decidiron explorar o río desde dentro. Para iso construíron as súas propias canoas e emprenderon unha viaxe que remataría converténdose na primeira baixada completa do Miño e, probablemente, tamén na única ata o momento. Esta experiencia serve agora como punto de partida dun proxecto expositivo que percorrerá oito concellos relevantes entre abril e novembro de 2026.
A concelleira de Cultura, Turismo e Promoción da Lingua, Maite Ferreiro, visitou a instalación desta exposición, que non só recupera a memoria daquela travesía pioneira, senón que tamén propón unha reflexión sobre o estado actual do río e o seu enorme valor natural e cultural. A iniciativa conta coa colaboración de diversas entidades e pretende poñer en valor o patrimonio fluvial galego, ao tempo que promove a conciencia ambiental arredor do Miño.
O río Miño, considerado moito máis ca un simple curso de auga, nace na serra de Meira e percorre 317 quilómetros ata desembocar no océano Atlántico ao pé do monte Trega. Ao longo do seu traxecto atravesa boa parte de Galicia, modelando paisaxes e contribuíndo ao desenvolvemento da vida, da economía e das tradicións. Pola súa relevancia e presenza no territorio, os primeiros galeguistas chegaron a identificalo como un símbolo, ao que denominaron Pai Miño, unha gran ruta aínda por descubrir no contexto actual.