Lugo acollerá unha exposición de Acisclo Manzano inspirada na Virxe dos Ollos Grandes
O Museo Provincial de Lugo acollerá a exposición 'Miradas', unha nova proposta artística do escultor Acisclo Manzano, unha das figuras máis recoñecidas da arte contemporánea galega e española, que nesta ocasión rende homenaxe á Virxe dos Ollos Grandes, patroa da cidade de Lugo.
A inauguración da mostra terá lugar o 2 de xullo ás 19:00 horas no Refectorio do Museo Provincial de Lugo nun acto promovido pola área de Cultura da Vicepresidencia da Deputación de Lugo e pola Rede Museística Provincial.
Ao longo da súa extensa traxectoria, Acisclo Manzano consolidouse como un dos creadores máis destacados do panorama artístico, cunha obra marcada pola forza expresiva, a espiritualidade e unha constante procura da dimensión humana a través da escultura e outras disciplinas artísticas. O artista desenvolveu un estilo propio no que a materia, a simboloxía e a capacidade emocional das pezas adquiren un especial protagonismo.
Nesta nova exposición, Manzano presenta unha visión persoal arredor da Virxe dos Ollos Grandes, unha das iconas relixiosas e patrimoniais máis representativas de Lugo. A través de 'Miradas', o autor establece un diálogo artístico entre a tradición, a espiritualidade e a interpretación contemporánea dunha figura profundamente vinculada á identidade da cidade.
A mostra forma parte da programación cultural impulsada pola Deputación de Lugo a través da Rede Museística Provincial, co obxectivo de achegar ao público novas propostas expositivas e poñer en valor a creación artística.