Lugo avanza cara unha xestión máis sostible co aumento do reciclaxe de envases lixeiros nun 12 %
As medidas impulsadas polo goberno de Paula Alvarellos están a consolidar as prácticas de economía circular en Lugo, logrando un importante aumento nos niveis de reciclaxe. Entre xaneiro e agosto de 2024, rexistrouse un incremento do 12 % na reciclaxe de envases lixeiros, o que supón 113 toneladas máis respecto ao mesmo período do ano anterior. Este avance reflicte o éxito das accións do executivo e a implicación da cidadanía na redución do impacto ambiental.
O papel e cartón tamén mostraron unha tendencia positiva, cun aumento de 4.000 quilos, acadando un total de 1.186 toneladas. Este crecemento é un indicador do compromiso dos lucenses co uso eficiente dos recursos e a redución do consumo excesivo de materiais. O edil de Transición Ecolóxica, Miguel Fernández, salientou o compromiso da veciñanza: "A poboación de Lugo está a dar un exemplo de responsabilidade ambiental que vai máis aló dun cambio temporal. O esforzo colectivo está a traducirse nunha cidade máis limpa e nun futuro máis sostible".
Tamén destacou que estas cifras amosan o éxito das campañas de concienciación impulsadas polo Goberno local. Ademais de envases lixeiros e papel, a recollida de aceite vexetal doméstico experimentou un notable aumento do 37%, con 18,45 toneladas recollidas no que vai de ano. Pola súa parte, os residuos téxtiles mantivéronse estables, con 114 toneladas rexistradas, en liña cos datos do ano anterior.
No referente ao contedor marrón, que recolle residuos orgánicos, entre xullo e agosto acumuláronse 4,6 toneladas, cunha media semanal de 511 kg. Estes resultados foron posibles grazas á participación de 450 veciños, que depositan unha media de 1,14 kg de residuos por persoa cada semana. Espérase que estas cifras continúen medrando conforme se instalen os 800 colectores previstos ao longo do ano, facilitando aínda máis a participación cidadá no coidado do medio ambiente. Estas cifras confirman o avance cara a unha xestión sostible dos residuos e a aposta de Lugo pola economía circular.