Infraestructuras

O Concello aprobará o proxecto promovido por Ballesol, cun investimento de 10,9 millóns de euros e 115 prazas, mentres o PSOE acusa a Elena Candia de apropiarse dun investimento privado

Lugo contará nos vindeiros anos cunha nova residencia privada para persoas maiores no barrio de Recatelo. A Xunta de Goberno Local prevé aprobar o próximo luns o proxecto promovido pola empresa Ballesol, que contempla un investimento de 10,9 millóns de euros e a creación de 115 prazas residenciais.

O futuro centro situarase na contorna das rúas Cidade de Viveiro e Isaac Díaz Pardo, preto do parque Rosalía de Castro, e incluirá tamén 77 prazas de aparcadoiro distribuídas en dous sotos.

A alcaldesa de Lugo, Elena Candia, presentou os detalles da actuación e destacou a importancia dunha iniciativa que permitirá ampliar a oferta de atención residencial para persoas maiores na cidade. O Goberno local considera que o proxecto representa un exemplo da capacidade de Lugo para atraer investimentos e novos equipamentos asistenciais.

Porén, o anuncio provocou a reacción do Grupo Municipal Socialista, que acusou á rexedora de intentar atribuírse un proxecto impulsado integramente pola iniciativa privada.

A voceira adxunta socialista, Ana González Abelleira, valorou positivamente a chegada do investimento e a recuperación dun espazo pendente de desenvolvemento, pero advertiu de que a concesión dunha licenza urbanística non pode presentarse como un logro político. “Unha cousa é celebrar que unha empresa aposte por Lugo e outra moi distinta apropiarse dese investimento e convertelo en propaganda de goberno”, sostivo.

Desde o PSOE lembran que o papel do Concello neste proceso consiste na tramitación administrativa do expediente, unha vez que a promotora presenta un proxecto que cumpre cos requisitos técnicos e urbanísticos establecidos.

Os socialistas aproveitaron ademais o debate para poñer o foco na situación da residencia pública de As Gándaras, onde continúan as críticas de residentes e familiares polos cambios previstos na distribución dos espazos. González Abelleira cuestionou que o Goberno local reivindique a atención ás persoas maiores a través dun proxecto privado mentres, ao seu xuízo, mantén unha postura discreta ante as reclamacións existentes na residencia pública dependente da Xunta.

Pola súa banda, Ballesol prevé desenvolver un centro especializado na atención ás persoas maiores, sumando novas prazas nun contexto marcado polo envellecemento da poboación e o aumento da demanda deste tipo de servizos. Segundo avanzou o Concello, a colocación da primeira pedra podería producirse antes de que remate o ano.