Lugo en Pé denuncia o abandono da Ruta dos Muíños e reclama unha actuación urxente do Concello
A asociación veciñal Lugo en Pé... na Defensa do Rural quixo trasladar á cidadanía a súa profunda preocupación polo estado de abandono que sofre a Ruta dos Muíños, o histórico sendeiro que discorre xunto ao río Mera desde Monte Segade ata a parroquia do Veral.
O colectivo lamenta que o que debería ser un corredor natural coidado, accesible e en boas condicións se teña convertido, ao seu xuízo, nun novo exemplo do deterioro que padece o rural lucense.
Segundo explica, un itinerario que no pasado era un camiño coidado, transitable e moi frecuentado presenta na actualidade un evidente estado de deterioro, con tramos invadidos pola maleza, zonas erosionadas, un firme irregular e numerosos obstáculos que comprometen a seguridade das persoas que o percorren.
A situación máis preocupante, engade a asociación, atópase no tramo final da ruta, xa na parroquia do Veral, onde unha árbore de grandes dimensións caeu atravesando tanto o río como o propio sendeiro, bloqueando completamente o paso e deixando o percorrido literalmente dividido en dúas partes.
Desde Lugo en Pé lembran que a Ruta dos Muíños non é só un espazo para pasear, senón tamén un enclave de gran valor histórico, paisaxístico e etnográfico. Sinalan que cada muíño, cada recuncho do río Mera e cada tramo do sendeiro forman parte da identidade do rural lucense, polo que consideran que permitir a súa degradación supón perder unha parte da historia común do municipio.
Por este motivo, a asociación esixe ao Concello de Lugo unha actuación urxente e integral que inclúa a retirada inmediata da árbore caída, a limpeza da vexetación invasora, a reparación dos tramos deteriorados e erosionados e a recuperación e posta en valor dos elementos tradicionais que forman parte da ruta.
Finalmente, Lugo en Pé defende que o rural lucense non pode seguir sendo un territorio esquecido e considera que a cidadanía merece espazos naturais seguros, accesibles e ben conservados. Ao seu xuízo, a Ruta dos Muíños, un dos enclaves máis emblemáticos do municipio, non pode continuar na actual situación de abandono.