Lugo reforza a programación estival con ximnasia ao aire libre e novas actividades gratuítas
O Concello de Lugo continúa promovendo iniciativas orientadas á adquisición de hábitos de vida saudables e ao envellecemento activo coa posta en marcha dun novo programa gratuíto de ximnasia ao aire libre destinado á cidadanía.
As sesións celebraranse durante os meses de xullo e agosto no parque da Milagrosa todos os martes e xoves ás 18.30 horas. A programación tamén incluirá actividades na Praza de Viana do Castelo, que se desenvolverán os luns e mércores entre as 18.30 e as 19.30 horas. A participación será libre e non será necesario realizar inscrición previa, co obxectivo de facilitar o acceso ao maior número posible de persoas.
Esta iniciativa incorpórase á programación de verán impulsada polos distintos centros de convivencia da cidade, que está a rexistrar unha ampla participación cidadá. Entre as propostas con maior seguimento destaca Pilates no Río, actividade que se desenvolve os luns e mércores de xullo e agosto ás 18.30 horas e que está a contar cunha notable resposta desde a súa posta en marcha.
Desde o Concello animan á veciñanza a participar nestas actividades, que buscan combinar exercicio físico, benestar e espazos de convivencia ao aire libre.
Por outra banda, tamén está prevista para esta tarde unha nova sesión de actividades á beira do río Miño, na contorna da piscina de Los Robles, entre as 17.00 e as 20.00 horas. A programación incluirá cinco inchables, dous deles con auga, nunha actividade gratuíta aberta á participación do público.