Lugo reforza a promoción da Vía Künig cun novo punto oficial de información ao peregrino
O Concello de Lugo puxo en marcha un novo punto oficial de información dedicado á Vía Künig, unha histórica ruta xacobea que conecta León con Lugo e que gaña cada vez máis protagonismo entre os peregrinos. A iniciativa forma parte da estratexia de promoción impulsada polo Concello xunto aos municipios lucenses polos que discorre este itinerario.
A inauguración do espazo estivo presidida pola alcaldesa de Lugo, Elena Candia, acompañada polo concelleiro de Turismo e Museos, Agustín Gallego; o alcalde das Nogais, Jesús Núñez; o tenente de alcalde de Becerreá, Manuel Martínez; o alcalde de Baralla, Miguel González; o alcalde do Corgo, Felipe Labrada, e o director técnico do proxecto, Javier Gómez.
A oficina municipal de turismo, situada na Praza do Campo, funcionará como punto de atención e asesoramento para os peregrinos que escollan esta alternativa ao Camiño Francés. Ademais de ofrecer información sobre o itinerario, distribuirá de forma gratuíta diverso material oficial da ruta.
Entre os recursos que poderán recoller os visitantes figuran planos detallados da Vía Künig ao seu paso por Galicia e pola provincia de León, credenciais para o peregrino, trípticos informativos editados en cinco idiomas e a coñecida "Bolsa Naranja", un dos elementos identificativos desta ruta xacobea.
Segundo destacou o Concello, o obxectivo desta iniciativa é mellorar a atención aos peregrinos e contribuír á promoción dunha ruta histórica que cada ano esperta un maior interese entre os camiñantes.